नशिराबाद प्रतिनिधी | येथील खंडेराव मंदिर परिसरात कौटुंबिक वादाचे पर्यवसान थेट हत्येत झाल्याची धक्कादायक घटना घडली. दारूच्या नशेत असलेल्या पतीने पत्नीवर कोयत्याने वार करून तिची निर्घृण हत्या केल्याने परिसरात भीतीचे वातावरण निर्माण झाले आहे. घटनेनंतर पोलिसांनी तातडीने कारवाई करत आरोपी पतीला ताब्यात घेतले.
मिळालेल्या माहितीनुसार, मंदाबाई जाधव यांच्यावर त्यांचे पती विकास जाधव यांनी कौटुंबिक कारणावरून संतापाच्या भरात कोयत्याने मानेवर वार केले. या हल्ल्यात मंदाबाई गंभीर जखमी झाल्या आणि त्यांचा घटनास्थळीच मृत्यू झाला. घटनेची माहिती मिळताच नशिराबाद पोलिसांनी घटनास्थळी धाव घेत पंचनामा करून तपास सुरू केला.
हत्येनंतर आरोपी विकास जाधव घटनास्थळावरून पसार झाला होता. मात्र पोलिसांनी तात्काळ शोधमोहीम राबवत त्याला अल्पावधीतच जेरबंद केले. त्यामुळे पुढील तपासाला गती मिळाली आहे.
मृत मंदाबाई या नशिराबाद येथील रहिवासी असून त्या रामा सोमा बागले यांच्या कन्या असल्याची माहिती आहे. त्यांचा विवाह रायपूर येथे झाला होता. काही दिवसांपासून पती-पत्नी नशिराबाद येथे वास्तव्यास होते. कौटुंबिक वादातून ही घटना घडल्याचा प्राथमिक अंदाज पोलिसांनी व्यक्त केला असून, नेमके कारण शोधण्यासाठी तपास सुरू आहे.
या प्रकरणी नशिराबाद पोलिस ठाण्यात खुनाचा गुन्हा दाखल करण्याची प्रक्रिया सुरू असून, आरोपीची सखोल चौकशी करण्यात येत आहे. या घटनेमुळे नशिराबाद परिसरात हळहळ व्यक्त केली जात आहे.
