अमळनेर प्रतिनिधी | शहरात माणुसकीला काळीमा फासणारी एक अत्यंत धक्कादायक आणि संतापजनक घटना समोर आली आहे. एका बेवारस मृतदेहावर अंत्यसंस्कार करण्यासाठी नगरपालिकेच्या ठेकेदाराने चक्क कचरा वाहून नेणाऱ्या ‘घंटागाडी’चा वापर केल्याचा प्रकार उघडकीस आला आहे. या अमानुष प्रकाराचा व्हिडिओ सोशल मीडियावर प्रचंड व्हायरल झाला असून, अमळनेर शहरासह संपूर्ण तालुक्यातून पालिकेच्या असंवेदनशीलतेवर तीव्र संताप व्यक्त केला जात आहे.
मिळालेल्या माहितीनुसार, अमळनेर शहरात काही दिवसांपूर्वी एक बेवारस मृतदेह आढळून आला होता. स्थानिक ग्रामीण रुग्णालयात या मृतदेहाचे शवविच्छेदन करण्यात आले. मात्र, पुढील दोन दिवसांत या मृतदेहाची ओळख पटवण्यासाठी किंवा ताब्यात घेण्यासाठी कोणतेही नातेवाईक समोर आले नाहीत. शेवटी प्रशासनाने या बेवारस मृतदेहावर विधिवत अंत्यसंस्कार करण्याचा निर्णय घेतला.
अगोदरच बेवारस मृत्यू आणि त्यात कोणीही नातेवाईक पाठीशी नसताना, पालिका आणि रुग्णालय प्रशासनाने मृतदेहाची सन्मानाने शववाहिनीतून वाहतूक करणे अपेक्षित होते. मात्र, नगरपालिकेच्या संबंधित ठेकेदाराने संवेदनशीलतेचा कळस गाठत हा मृतदेह कचऱ्याच्या घंटागाडीत टाकून अंत्यविधीसाठी नेला. मानवी मूल्ये किती खालावली आहेत, याचाच प्रत्यय या घटनेतून आला.
नगराध्यक्षांकडून चौकशीचे आश्वासन
या घटनेचा व्हिडिओ समाजमाध्यमांवर व्हायरल होताच नागरिकांमधून संतप्त प्रतिक्रिया उमटू लागल्या. परिस्थितीचे गांभीर्य ओळखून अमळनेरचे नगराध्यक्ष डॉ. परीक्षित बाविस्कर यांनी या प्रकरणाची दखल घेतली आहे. या घटनेची सखोल चौकशी करून दोषींवर कठोर कारवाई करण्यात येईल, असे आश्वासन त्यांनी दिले आहे. मात्र, या घटनेमुळे पालिकेच्या कारभारावर आणि नैतिकतेवर मोठे प्रश्नचिन्ह निर्माण झाले आहे.
