जळगाव प्रतिनिधी | जळगाव जिल्हा पोलीस दलाने बेकायदेशीर शस्त्रास्त्रांच्या वाहतुकीविरुद्ध एक मोठी आणि यशस्वी कारवाई केली आहे. स्थानिक गुन्हे शाखा आणि चोपडा शहर पोलीस स्टेशनच्या संयुक्त पथकाने एका आंतरजिल्हा टोळीचा पर्दाफाश करत तीन आरोपींना अटक केली आहे. या कारवाईत एक गावठी पिस्तूल, दोन मॅगझिन, तीन मोबाईल आणि एक कार असा एकूण ६ लाख रुपयांचा मुद्देमाल जप्त करण्यात आला आहे.
स्थानिक गुन्हे शाखेच्या अंमलदारांना गुप्त बातमीदारामार्फत एक महत्त्वपूर्ण माहिती मिळाली होती. काही संशयित इसम कारमधून विनापरवाना गावठी कट्टा घेऊन लासूर-चुंचाळे मार्गे चोपडा शहराकडे येत असल्याची ती माहिती होती. या माहितीची खातरजमा करून पोलिसांनी तातडीने चोपडा-लासूर-चुंचाळे रस्त्यावरील शनिमंदिर परिसरात सापळा रचला.
सायंकाळी ७ वाजताच्या सुमारास संशयास्पद ‘ह्युंदाई इऑन’ कार (क्रमांक MH 20 EE 6103) तिथे आली असता, पोलिसांनी ती अडवून पंचांसमक्ष तिची झडती घेतली. यावेळी कारच्या मागील सीटखाली ६० हजार रुपयांचा गावठी कट्टा व १० हजार रुपयांचे अतिरिक्त मॅगझिन आढळून आले. पोलिसांनी ५ लाख रुपयांची कार आणि ३० हजार रुपयांचे तीन मोबाईल फोन जप्त करत आरोपींना ताब्यात घेतले.
या प्रकरणी ज्ञानेश्वर रामकृष्ण माळी (वय ३९, रा. पाचोरा), सचिन रोशन पवार (वय ३४, रा. छत्रपती संभाजीनगर) आणि अनिल कचरे साळुंखे (वय ३७, रा. छत्रपती संभाजीनगर) या तिघांना अटक करण्यात आली आहे. चोपडा शहर पोलीस ठाण्यात गुन्हा दाखल करण्यात आला असून, पोलीस अधीक्षक श्रीकांत धिवरे यांच्या मार्गदर्शनाखाली पुढील तपास सुरू आहे. अवैध शस्त्रास्त्रांवर नियंत्रण मिळवण्याच्या मोहिमेतील हे जळगाव पोलिसांचे मोठे यश मानले जात आहे.
