जळगाव प्रतिनिधी | लाचखोरी प्रकरणात अटक करण्यात आलेले अकोला येथील मुद्रांक जिल्हाधिकारी किरण चौधरी यांच्या जळगाव येथील निवासस्थानी लाचलुचपत प्रतिबंधक विभागाने केलेल्या ‘इन-कॅमेरा’ झाडाझडतीत तब्बल २ कोटी ९४ लाख ६४ हजार ८४७ रुपयांचा मुद्देमाल जप्त करण्यात आला आहे. या कारवाईमुळे प्रशासकीय वर्तुळात मोठी खळबळ उडाली आहे.
नाशिक व जळगाव एसीबीच्या आठ ते दहा अधिकाऱ्यांच्या संयुक्त पथकाने मंगळवारी रात्री उशिरापर्यंत ही सखोल तपासणी केली. झाडाझडती दरम्यान घरातून १ कोटी ५३ लाख ८४ हजार ६३० रुपयांची रोख रक्कम, ४२२.१०० ग्रॅम सोन्याचे ६० लाख ५७ हजार १३५ रुपयांचे दागिने, तसेच १५४.५०० ग्रॅम चांदीचे ३१ हजार ४१६ रुपयांचे दागिने आढळून आले.
याशिवाय ११ लाख ५२ हजार ७४५ रुपयांच्या सोने खरेदीच्या पावत्या, ६ लाख २५ हजार ५४५ रुपयांच्या घरगुती वस्तू, तसेच आरोपी आणि त्यांच्या कुटुंबीयांच्या नावावर विविध ठिकाणी असलेल्या ६२ लाख १३ हजार ३७६ रुपयांच्या मालमत्तेची कागदपत्रे एसीबीने जप्त केली आहेत. सर्व मिळून २.९४ कोटी रुपयांहून अधिक किमतीचा मुद्देमाल ताब्यात घेण्यात आला आहे.
दरम्यान, अकोला येथे १० हजार रुपयांची लाच स्वीकारताना किरण चौधरी यांना रंगेहाथ अटक करण्यात आली होती. या प्रकरणी अकोला येथील सिटी कोतवाली पोलीस ठाण्यात गुन्हा दाखल असून एसीबीकडून त्यांच्या आर्थिक व्यवहारांची आणि मालमत्तेची सखोल चौकशी सुरू आहे. या तपासातून आणखी महत्त्वाची माहिती समोर येण्याची शक्यता व्यक्त केली जात आहे.
