भुसावळ प्रतिनिधी | भुसावळ शहरातील मोटरसायकल प्रकरणात भुसावळ शहर पोलिसांनी मोठी कारवाई करत एका सराईत मोटरसायकल चोराला अटक केली आहे. त्याच्याकडून चोरीच्या सहा मोटरसायकली जप्त करण्यात आल्या असून, मोटरसायकल चोरीच्या सहा गुन्ह्यांची उकल करण्यात पोलिसांना यश आले आहे.
भुसावळ शहरातील झेडटीएस रोडवरील एमओएच पार्किंग शेड येथून फिर्यादी विजय जगन्नाथ खडके यांची सुमारे १५ हजार रुपये किमतीची मोटरसायकल चोरीला गेली होती. याप्रकरणी २७ जानेवारी रोजी भुसावळ शहर पोलीस ठाण्यात गुन्हा दाखल करण्यात आला होता.
या गुन्ह्याचा तपास करताना पोलीस अधीक्षक श्रीकांत धिवरे, अपर पोलीस अधीक्षक रूपाली दरेकर तसेच उपविभागीय पोलीस अधिकारी केदार बावळे यांच्या मार्गदर्शनाखाली पोलीस निरीक्षक महेश गायकवाड यांच्या पथकाने स्वतंत्र तपास सुरू केला. तांत्रिक विश्लेषण, सीसीटीव्ही फुटेजची तपासणी आणि गोपनीय माहितीच्या आधारे संशयिताचा शोध घेण्यात आला.
तपासादरम्यान संशयित आरोपी विशाल राजेंद्र राठोड (वय ४६, रा. सरदार वल्लभभाई मार्ग, अमनखेडे रोड, गणेश मंदिराजवळ, भिकनगाव, जि. खरगोन, मध्य प्रदेश) याला ताब्यात घेण्यात आले. चौकशीत त्याने मोटरसायकल चोरीच्या सहा गुन्ह्यांची कबुली दिल्याचे पोलिसांनी प्रसिद्धीपत्रकात म्हटले आहे. त्याच्याकडून सहा चोरीच्या मोटरसायकली जप्त करण्यात आल्या आहेत.
