‘फ्लाय ९१’कडून तयारी अंतिम टप्प्यात
जळगाव : महाराष्ट्रातील वेगाने विकसित होत असलेल्या विमानतळांपैकी एक असलेल्या जळगाव विमानतळावरून सध्या मुंबई, पुणे, गोवा आणि हैदराबाद या प्रमुख शहरांसाठी विमानसेवा सुरू आहे. आता जळगावकरांसाठी आणखी एक दिलासादायक बातमी असून, जळगाव लवकरच थेट विमानसेवेद्वारे इंदूरशी जोडले जाणार आहे.
‘फ्लाय ९१’ या विमान कंपनीने जळगाव–इंदूर मार्गावर सेवा सुरू करण्यासाठी हालचाली सुरू केल्या असून, या विमानफेरीचे नियोजन सध्या अंतिम टप्प्यात असल्याची माहिती देण्यात आली आहे. लवकरच याबाबत अधिकृत घोषणा होण्याची शक्यता आहे.
दरम्यान, जळगाव विमानतळावर अलीकडेच नाईट लँडिंगसह विविध अत्याधुनिक सुविधा उपलब्ध करून देण्यात आल्या आहेत. या सुधारित पायाभूत सुविधांमुळे नवीन विमान कंपन्यांना जळगावहून सेवा सुरू करणे सुलभ झाले असून, त्याचा थेट लाभ प्रवाशांना मिळत आहे.
जळगाव–इंदूर विमानसेवा विनाविलंब सुरू होण्याची शक्यता असून, यामुळे खान्देश आणि मध्य प्रदेशातील व्यावसायिक, शैक्षणिक व वैद्यकीय क्षेत्रातील संपर्क अधिक मजबूत होणार आहेत. सध्या मुंबई व पुण्यासारख्या शहरांसाठी असलेल्या विमानसेवेमुळे प्रवाशांचा वेळ वाचत असून, इंदूरशी थेट कनेक्टिव्हिटी मिळाल्यास ही सुविधा जळगावकरांसाठी अधिकच लाभदायक ठरणार आहे.
