यावल प्रतिनिधी | यावल येथील एकात्मिक आदिवासी प्रकल्प विकास कार्यालयात अधिकारी आणि कर्मचाऱ्यांशी झालेल्या कथित अपमानास्पद वागणुकीच्या निषेधार्थ आज बेमुदत कामबंद आंदोलन सुरू करण्यात आले आहे. या आंदोलनामुळे प्रकल्प कार्यालयासह त्याअंतर्गत येणाऱ्या सर्व शाळांमधील प्रशासकीय कामकाजावर परिणाम झाला असून, शंभर टक्के कामबंद पाळण्यात आला आहे.
या आंदोलनाला जिल्ह्यातील विविध कर्मचारी संघटना आणि सामाजिक संघटनांनीही जाहीर पाठिंबा दिला आहे. आंदोलनस्थळी प्रकल्प अधिकारी अरुण पवार यांनी भेट देत संबंधित प्रकरणातील आरोपींना तातडीने अटक करण्याची मागणी केली. दोषींवर कठोर कारवाई होईपर्यंत आंदोलन मागे घेणार नसल्याचा स्पष्ट इशारा आंदोलनकर्त्यांनी प्रशासनाला दिला आहे.
अधिकाऱ्यांचा सन्मान आणि सुरक्षितता अबाधित राहावी तसेच भविष्यात अशा प्रकारच्या घटना घडू नयेत, यासाठी प्रशासनाने तातडीने ठोस पावले उचलावीत, अशी मागणीही यावेळी करण्यात आली. आंदोलनामुळे कार्यालयीन कामकाज ठप्प झाले असून, संबंधित शाळांच्या प्रशासकीय प्रक्रियेवरही त्याचा परिणाम झाला आहे. आता प्रशासन या आंदोलनाची किती लवकर दखल घेते आणि आरोपींवर कोणती कारवाई करते, याकडे सर्वांचे लक्ष लागले आहे.
