चोपडा | विलास पाटील
जळगाव जिल्ह्यातील चोपडा तालुक्यातील वडती गावात एका जन्मदात्या बापाने आपल्या दोन मुलांवर झोपेत असताना कुऱ्हाडीने हल्ला केल्याची अत्यंत धक्कादायक घटना रविवारी उघडकीस आली.
या हल्ल्यात 13 वर्षीय मीरा सुभाष भिलाला हिचा जागीच मृत्यू झाला, तर 11 वर्षीय रामु सुभाष भिलाला हा गंभीर जखमी झाला असून त्याच्यावर रुग्णालयात उपचार सुरू आहेत. त्याची प्रकृती चिंताजनक असल्याची माहिती मिळाली आहे.
या प्रकरणातील संशयित आरोपी सुभाष गोपाळ भिलाला (वय 50) हा घटना घडल्यानंतर जंगलाच्या दिशेने फरार झाला होता. घटनेची माहिती मिळताच अडावद पोलीस ठाण्याच्या पथकाने तातडीने शोधमोहीम राबवून आरोपीला ताब्यात घेतले. त्याच्याकडे पोलिसांकडून कसून चौकशी सुरू आहे.
प्राथमिक माहितीनुसार, दोन्ही मुले घरात झोपेत असताना त्यांच्यावर कुऱ्हाडीने वार करण्यात आले. हल्ल्याचे नेमके कारण अद्याप स्पष्ट झालेले नाही. कौटुंबिक वाद, मानसिक स्थिती किंवा अन्य कोणते कारण याबाबत पोलीस सर्व बाजूंनी तपास करत आहेत.
घटनेनंतर वडती गावासह परिसरात भीती आणि हळहळ व्यक्त केली जात आहे. अडावद पोलिसांनी घटनास्थळी पंचनामा करून पुरावे संकलित केले असून पुढील तपास सुरू आहे. या अमानुष घटनेमुळे संपूर्ण चोपडा तालुक्यात खळबळ उडाली असून आरोपीविरुद्ध गुन्हा दाखल करण्याची प्रक्रिया सुरू आहे.
