चाळीसगाव प्रतिनिधी | तालुक्यातील प्रसिद्ध पाटणादेवी पर्यटनस्थळावर पुन्हा एकदा काळीज पिळवटून टाकणारी घटना घडली आहे. धवलतीर्थ धबधब्याच्या पाण्यात बुडून २३ वर्षीय कृष्णा संतोष गायकवाड या तरुणाचा दुर्दैवी मृत्यू झाला. कृष्णा हा कन्नड येथील रहिवासी होता.
धबधब्याच्या पाण्यात तरुण बुडाल्याची माहिती मिळताच वन विभागाचे कर्मचारी आणि पोलिसांनी तातडीने घटनास्थळी धाव घेतली. वनपाल कैलास चव्हाण आणि राजाराम चव्हाण यांनी शोधमोहीम राबवत मृतदेह पाण्याबाहेर काढण्यासाठी मदत केली. पोलिसांच्या पथकानेही घटनास्थळी आवश्यक कार्यवाही केली.
मृतदेह पुढील कार्यवाहीसाठी चाळीसगावच्या ट्रॉमा सेंटरमध्ये नेण्यात आला असून, पोलिसांकडून नोंदणीची प्रक्रिया सुरू होती.
दरम्यान, पावसाळ्यात धवलतीर्थला पर्यटकांची मोठी गर्दी होते. मात्र खोल पाणी, वेगवान प्रवाह आणि घसरडे दगड यामुळे हा परिसर धोकादायक ठरत आहे. त्यामुळे पर्यटकांच्या सुरक्षेसाठी ठोस उपाययोजना कधी होणार, हा प्रश्न पुन्हा ऐरणीवर आला आहे. पर्यटकांनी जीव धोक्यात घालून पाण्यात उतरणे टाळण्याचे आवाहन करण्यात येत आहे.
