जळगाव प्रतिनिधी | नाशिकच्या कुंभमेळ्याच्या नावावर कोट्यवधींच्या फसवणुकीचा धक्कादायक खेळ सुरू असल्याचा गंभीर खुलासा मंत्री गिरीश महाजन यांनी केला आहे. कुंभमेळ्यात कंत्राट मिळवून देतो, मोठी कामे मिळवून देतो, असे आमिष दाखवत राज्यभरातील नागरिकांकडून लाखो-कोट्यवधी रुपये उकळल्याची माहिती समोर आली आहे.
विशेष म्हणजे या फसवणुकीसाठी ऑनलाइन बनावट कागदपत्रे आणि चक्क विभागीय आयुक्त प्रवीण गेडाम यांच्या नावाच्या बनावट वर्क ऑर्डरचा वापर करण्यात आल्याचे सांगण्यात येत आहे. पोलिस कर्मचाऱ्यांना पाणीपुरवठा, चौरंग आणि इतर कामांचे कंत्राट मिळवून देण्याचे आमिष दाखवण्यात आले. कागदपत्रे हातात दिली आणि त्यानंतर पैसे उकळले गेले.
जामनेरमधील दोन जणांसह धुळे, मुंबई आणि राज्यातील इतर भागांतील नागरिकही या फसवणुकीचे बळी ठरल्याची माहिती आहे. पीडितांनी मंत्री गिरीश महाजन यांची भेट घेतल्यानंतर हा प्रकार समोर आला.
या प्रकरणाची मुख्यमंत्री देवेंद्र फडणवीस यांनी गंभीर दखल घेत कडक कारवाईचे आदेश दिल्याची माहिती महाजन यांनी दिली आहे. पोलीस महासंचालकांकडेही तक्रार करण्यात आली आहे.
आता प्रश्न आहे—कुंभमेळ्याच्या नावाखाली फसवणुकीचा हा खेळ नेमका किती मोठा आहे? आरोपींच्या अटकेनंतर राज्यभरातील मोठे रॅकेट उघड होण्याची शक्यता व्यक्त केली जात आहे.
म्हणूनच कुंभमेळ्याच्या नावावर कोणतेही कंत्राट, वर्क ऑर्डर किंवा सरकारी काम मिळवून देण्याचे आमिष दाखवले जात असेल, तर पैसे देण्याआधी कागदपत्रांची अधिकृत खात्री करा; अन्यथा मोठ्या आर्थिक फसवणुकीला सामोरे जावे लागू शकते.
