धरणगाव प्रतिनिधी | तालुक्यातील सावदे प्रचा परिसरात बंद घराचा कडी-कोयंडा तोडून अज्ञात चोरट्यांनी घरातील कपाट फोडत तब्बल 55 हजार रुपयांची रोकड लंपास केल्याची घटना समोर आली आहे. या चोरीमुळे परिसरात खळबळ उडाली असून, धरणगाव पोलिसांनी अज्ञात चोरट्याविरुद्ध गुन्हा दाखल केला आहे.
पोलिसांकडून मिळालेल्या माहितीनुसार, फिर्यादी शरद काशिनाथ पवार (वय 38, व्यवसाय शेती, रा. विठ्ठल मंदिराच्या पाठीमागे, सावदे प्रचा, ता. एरंडोल, जि. जळगाव) हे आपल्या कुटुंबासह राहत आहेत. 21 ऑगस्ट रोजी रात्री 11 वाजेपासून 22 ऑगस्ट रोजी सकाळी 6 वाजेच्या दरम्यान अज्ञात चोरट्यांनी त्यांच्या बंद घराला लक्ष्य केले.
चोरट्यांनी घराच्या दरवाजाचा कडी-कोयंडा तोडून आत प्रवेश केला. त्यानंतर घरातील लाकडी कपाटाचे लॉक तोडून त्यात ठेवलेली 55 हजार रुपयांची रोख रक्कम चोरून नेली. या रकमेमध्ये 500, 200 आणि 100 रुपयांच्या चलनी नोटांचा समावेश असल्याचे फिर्यादीत नमूद करण्यात आले आहे.
घटनेची माहिती मिळताच धरणगाव पोलिसांनी घटनास्थळी पाहणी करून तपास सुरू केला. याप्रकरणी गुन्हा दाखल करण्यात आला आहे.
