जळगाव प्रतिनिधी | शहरातील स्वच्छता आणि नागरिकांच्या समस्यांचा आढावा घेण्यासाठी महापौर स्वच्छता संकल्प अभियानांतर्गत महापौर दीपमाला काळे यांनी शुक्रवार, २३ ऑक्टोबर रोजी प्रभाग क्रमांक ७ मध्ये प्रत्यक्ष पाहणी केली. या दौऱ्यात गटारींची दुरवस्था, अतिक्रमणे, रस्त्यांवरील अडथळे आणि पाण्याचा अपव्यय निदर्शनास आल्याने महापौरांनी तीव्र नाराजी व्यक्त केली. संबंधित विभागांना तातडीने कारवाई करण्याचे निर्देशही दिले.
गणेश कॉलनी चौकातील गुरुदत्त मंदिर परिसरात रस्त्याला अडथळा ठरणाऱ्या बंद टपऱ्या हटवण्याच्या सूचना देण्यात आल्या. तसेच प्रभागातील अनेक ठिकाणी गटारींची वेळेवर सफाई झाली नसल्याचे आढळले. गटारींवरील अतिक्रमणे हटवून परिसर स्वच्छ करण्याचे आदेश आरोग्य आणि बांधकाम विभागाला देण्यात आले.
बजरंग बोगदा परिसरात धूळ खात पडलेले साहित्य, अतिक्रमणांचे सांगाडे आणि वाढलेले गवत तातडीने हटवण्याचे निर्देश महापौरांनी दिले. याशिवाय तीन ठिकाणी बंद अवस्थेत उभी असलेली चारचाकी वाहने हटवण्याची सूचनाही करण्यात आली.
पाहणीदरम्यान एका ठिकाणी पिण्याच्या पाण्याची मोठ्या प्रमाणात नासाडी होत असल्याचे आढळल्याने संबंधित व्यक्तीला नोटीस बजावण्याचे निर्देश देण्यात आले. शहर स्वच्छ आणि सुटसुटीत ठेवण्यासाठी मोहीम अधिक तीव्र करण्याचा इशाराही महापौरांनी दिला.
दरम्यान, श्रीहरी नगर परिसरात सुरू असलेल्या सिमेंट रस्त्याच्या कामाची पाहणी करून महापौरांनी नागरिकांशी संवाद साधला व त्यांच्या समस्या जाणून घेतल्या. यावेळी नगरसेवक चंद्रशेखर अत्तरदे, विशाल भोळे, अंकिता पंकज पाटील आणि महापालिकेचे अधिकारी व कर्मचारी उपस्थित होते.
