जळगाव प्रतिनिधी | जळगाव ते पाचोरा दरम्यान रेल्वे रुळांच्या दुरुस्तीच्या कामामुळे म्हसावद येथील रेल्वे फाटक क्रमांक १४४ आज पहाटे ४ वाजेपासून सलग १४ तास वाहतुकीसाठी बंद ठेवण्यात येणार आहे. या बंदचा परिणाम जळगाव शहरातील महामार्गावरील वाहतुकीवर होण्याची शक्यता असून, वाहनधारकांना वाहतूक कोंडीचा सामना करावा लागू शकतो.
मध्य रेल्वेच्या पाचोरा विभागात रेल्वे रुळांच्या तातडीच्या दुरुस्तीचे काम हाती घेण्यात आले आहे. त्यामुळे म्हसावद मार्गे नेरी, पहूर, जामनेर, बोदवड तसेच छत्रपती संभाजीनगर आणि विदर्भाकडे जाणाऱ्या वाहनांना पर्यायी मार्गांचा वापर करावा लागणार आहे. परिणामी, एरंडोलमार्गे जळगाव शहरातून जाणाऱ्या वाहनांची संख्या वाढण्याची शक्यता आहे.
शहरातील महामार्गावर नेहमीच्या तुलनेत ३० ते ४० टक्के अतिरिक्त वाहतुकीचा भार वाढू शकतो. विशेषतः अजिंठा चौक, इच्छादेवी चौक आणि काशिनाथ लॉज चौक या प्रमुख ठिकाणी वाहनांच्या लांबच लांब रांगा लागण्याची शक्यता वर्तवण्यात येत आहे. अवजड वाहनांची संख्या वाढल्यास वाहतूक कोंडीसोबतच अपघातांचाही धोका निर्माण होऊ शकतो.
दरम्यान, वाहनधारकांनी शक्यतो महामार्गावरील गर्दी टाळून समांतर रस्ते आणि पर्यायी मार्गांचा वापर करावा, असे आवाहन करण्यात येत आहे. प्रमुख चौकांमध्ये वाहतूक पोलिसांनी नियोजन करून वाहतुकीचे व्यवस्थापन केल्यास संभाव्य कोंडी कमी करण्यास मदत होऊ शकते. रेल्वे फाटक बंद असलेल्या कालावधीत नागरिकांनी प्रवासाचे नियोजन करूनच घराबाहेर पडणे सोयीचे ठरणार आहे.
