मालेगाव महापालिकेची कोसळली लिफ्ट; मोठा अनर्थ टळला
नाशिक | महापौर व उपमहापौर पदाची निवडणूक संपताच महापालिका इमारतीत मोठी दुर्घटना घडली. इमारतीतील लिफ्ट चौथ्या मजल्यावरून अचानक कोसळली. सुदैवाने या घटनेत कोणतीही जीवितहानी झाली नाही. लिफ्टची चैन तुटल्यामुळे हा अपघात झाल्याची प्राथमिक माहिती आहे.
मिळालेल्या माहितीनुसार, लिफ्टमध्ये एकूण १८ जण अडकले होते. लिफ्ट चौथ्या मजल्यावरून कोसळताना थेट तळमजल्यावर न आदळता पहिल्या मजल्यावर तिचा दरवाजा अडकला. त्यामुळे मोठा अनर्थ टळला आणि सर्वजण सुखरुप राहिले.
घटनेची माहिती मिळताच अग्निशमन दल व पोलिसांनी तातडीने घटनास्थळी धाव घेतली. पहिल्या मजल्यावरील भिंत तोडून लिफ्टमध्ये अडकलेल्या नागरिकांना एकेक करून सुरक्षितपणे बाहेर काढण्यात आले. या लिफ्टमध्ये इस्लाम पार्टीचे असिफ शेख, मुश्तकिन डिग्निटी यांच्यासह काही नगरसेवक तसेच पाच पत्रकार अडकले होते. घटनेनंतर महापालिका प्रशासनाच्या सुरक्षितता व्यवस्थेबाबत प्रश्न उपस्थित होत असून लिफ्टच्या देखभालीची सखोल चौकशी करण्याची मागणी होत आहे.
