घरगुती गॅस सिलिंडरचा वापर व्यावसायिक कारणासाठी होत असल्याचे निदर्शनास आले
जळगाव । युद्धजन्य परिस्थितीमुळे सिलिंडरचा पुरवठा विस्कळीत झाला असून दुसरीकडे नंबर लावल्यावरही सिलिंडर वेळेत मिळत नसल्याची ओरड ग्राहकांकडून होत आहे. त्यातच घरगुती गॅस सिलिंडरचा वापर व्यावसायिक कारणासाठी होत असल्याचे निदर्शनास आले असून अशातच घरगुती वापराच्या सिलिंडरचा काळाबाजार रोखण्यासाठी जिल्हा प्रशासनाच्या विशेष पथकाकडून धाडसत्र राबविले जात आहे.
गेल्या आठवडाभरात २८१ ठिकाणी धाडी टाकल्यानंतर घरगुती १९ सिलिंडरचा व्यावसायिक वापर होत असल्याचे स्पष्ट झाले आहे. त्यामुळे प्रशासनाने १८ हजार १३४ रुपये किमतीचे सिलिंडर जप्त केले आहेत. काळाबाजार घरगुती गॅसचा रोखण्यासाठी भुसावळ महसूल विभागाच्या वतीने पथके नेमण्यात आली. ठिकठिकाणी महसूल विभाग छापेमारी करत आहे. यात छोटे-मोठे हॉटेल व्यावसायिक घरगुती गॅसचा वापर करणाऱ्यांविरोधात कारवाई केली जात आहे. या कारवाईत घरगुती सिलिंडर जप्त करण्यात आले.
दरम्यान, जिल्हा पुरवठा अधिकारी कार्यालयाने दि. १३ मार्चपासून गॅस कंपन्यांकडून उपलब्ध साठ्याचा दैनंदिन अहवालदेखील घेतला आहे. त्यानुसार तीनही गॅस सिलिंडर वितरक कंपन्यांकडे पुरेसा साठा उपलब्ध असल्याचे स्पष्ट झाले आहे.दरम्यान, जळगाव शहरात गेल्या काही दिवसांपासून एलपीजी गॅस सिलिंडरची मागणी वाढली आहे. याचा थेट परिणाम गृहिणींच्या दैनंदिन स्वयंपाक व्यवस्थेवर झाला आहे. त्यामुळे पर्याय म्हणून इंडक्शनचा वापर झपाट्याने वाढला आहे. घरगुती वापरासोबतच हॉटेल, खानावळी आणि लहान व्यावसायिकांनीदेखील इंडक्शन वापराकडे मोर्चा वळवला आहे. मात्र, वीजबिलाचा फटका बसत असताना ‘एलपीजी’ एजन्सीधारकांकडे सातत्याने विचारणा सुरू असल्याचे चित्र दिसून येत आहे.
