कंपनीविरोधात कारवाईची मागणी; सहकाऱ्यांकडून अश्रुपूर्ण श्रद्धांजली
जळगाव – महाराष्ट्र सेल्स अँड मेडिकल रिप्रेझेंटेटिव्ह असोसिएशन जळगाव युनिटच्या वतीने स्वर्गीय अजितेश यांच्या दुर्दैवी निधनाच्या निषेधार्थ कँडल मार्च काढण्यात आला.शहरातील काव्य रत्नावली चौक येथे आयोजित या कँडल मार्चमध्ये मोठ्या संख्येने मेडिकल रिप्रेझेंटेटिव्ह, पदाधिकारी व कार्यकर्ते सहभागी झाले होते. हातात मेणबत्त्या घेऊन शांततेत निषेध व्यक्त करत सर्वांनी स्व. अजितेश यांच्या प्रतिमेस पुष्पहार अर्पण करून भावपूर्ण श्रद्धांजली वाहिली.
यावेळी उपस्थितांनी औषध कंपन्यांमधील वाढता टार्गेटचा ताण, मानसिक दबाव आणि कामाच्या कठीण अटी यावर तीव्र नाराजी व्यक्त केली. अशा प्रकारच्या घटना पुन्हा घडू नयेत यासाठी संबंधित कंपनीवर कठोर कारवाई करावी, अशी मागणी करण्यात आली.
MSMRA च्या वतीने दिलेल्या निवेदनात कंपनीच्या व्यवस्थापनाविरोधात सखोल चौकशी करून जबाबदारांवर कारवाई करण्याची मागणी करण्यात आली आहे. तसेच मेडिकल रिप्रेझेंटेटिव्ह यांच्या कामाच्या अटी सुधाराव्यात, असेही नमूद करण्यात आले.कार्यक्रमाच्या शेवटी दोन मिनिटे मौन पाळून स्व. अजितेश यांना श्रद्धांजली अर्पण करण्यात आली.
