जळगाव प्रतिनिधी | जळगाव पोलीस दलात शिस्त आणि कर्तव्याप्रती गांभीर्य राखण्यासाठी पोलीस अधीक्षकांनी मोठी कारवाई केली आहे. पोलीस अधीक्षक बंगल्याच्या सुरक्षा ड्युटीवर असताना विनापरवाना गैरहजर राहणे आणि शासकीय शस्त्रास्त्रांची सुरक्षितता धोक्यात आणल्याप्रकरणी दोन पोलीस अंमलदारांना तातडीने निलंबित करण्यात आले आहे. या कारवाईमुळे पोलीस दलात एकच खळबळ उडाली आहे.
मिळालेल्या माहितीनुसार, ८ मे रोजी रात्री ९:२० वाजेच्या सुमारास राखीव पोलीस निरीक्षक, पोलीस मुख्यालय, जळगाव यांनी पोलीस अधीक्षक बंगल्यावरील गार्ड ड्युटीचे अचानक निरीक्षण केले. या सरप्राईज चेकिंग दरम्यान धक्कादायक बाब समोर आली. गार्ड ड्युटीवर तैनात असलेले सफौ/१३७८ संभाजी निबाजी पाटील आणि पोना/३९३ प्रदिप भगतसिंग राजपूत हे दोघेही आपल्या नेमणुकीच्या ठिकाणी हजर नव्हते.
केवळ अनुपस्थितीच नाही, तर तपासणी दरम्यान अत्यंत गंभीर बाब समोर आली. गार्ड रूममध्ये असलेली ३ एस.एल.आर. रायफल (बट नं. ८२.२६२.८८२) ही कोणत्याही सुरक्षिततेविना आणि विना दारूगोळा बेवारस स्थितीत टाकून देण्यात आली होती. एका संवेदनशील ठिकाणी ड्युटीवर असताना अशा प्रकारे शस्त्रास्त्रांकडे दुर्लक्ष करणे आणि कर्तव्याच्या ठिकाणाहून गायब होणे, हा अत्यंत गंभीर स्वरूपाचा निष्काळजीपणा मानला जात आहे.
प्रशासकीय कारवाई
या दोन्ही कर्मचाऱ्यांचे हे वर्तन ‘महाराष्ट्र नागरी सेवा (वर्तवणूक) नियम १९७९’ मधील नियम ३ चे स्पष्ट उल्लंघन असल्याचे सिद्ध झाले आहे. याची गंभीर दखल घेत पोलीस अधीक्षक, जळगाव यांनी या दोन्ही अंमलदारांना शासकीय सेवेतून निलंबित करण्याचे आदेश जारी केले आहेत.
निलंबनाचे अटी व नियम
निलंबन कालावधीत या दोन्ही कर्मचाऱ्यांचे मुख्यालय जळगाव पोलीस मुख्यालयच राहणार आहे. तसेच, सक्षम प्राधिकाऱ्यांच्या पूर्वपरवानगीशिवाय त्यांना मुख्यालय सोडण्यास सक्त मनाई करण्यात आली आहे. या कारवाईमुळे कर्तव्यात कसूर करणाऱ्या कर्मचाऱ्यांचे धाबे दणाणले असून, “शिस्तभंग खपवून घेतला जाणार नाही” असा स्पष्ट संदेश प्रशासनाने दिला आहे.
