भुसावळ प्रतिनिधी | बेकायदेशीररीत्या भारतात वास्तव्य करणाऱ्या परदेशी नागरिकांविरुद्ध जळगाव पोलिसांनी आपली मोहीम तीव्र केली आहे. भुसावळ बाजारपेठ पोलीस स्टेशनच्या हद्दीत कारवाई करत पोलिसांनी आणखी एका बांगलादेशी घुसखोर महिलेला शोधून काढले आहे. या प्रकरणी संबंधित महिलेविरुद्ध गुन्हा दाखल केला आहे.
मिळालेल्या माहितीनुसार, अटक करण्यात आलेल्या आरोपी महिलेचे मूळ नाव फरीदा बेगम मोहम्मद खान (वय ४२, रा. पीरोजपुर, बांगलादेश) असे आहे. ती भारतात आल्यानंतर ‘जस्मिन बी मोहम्मद खान’ या बनावट नावाने भुसावळ येथील दीनदयाल नगर भागात राहत होती. पोलिसांनी केलेल्या प्राथमिक चौकशीत धक्कादायक माहिती समोर आली आहे. आरोपी महिलेने २००९ मध्ये एका दलालाला ५ हजार रुपये देऊन बोटीच्या सहाय्याने नदीमार्गे पश्चिम बंगालमध्ये बेकायदेशीर प्रवेश केला होता आणि तिथून ती रेल्वेने भुसावळात आली.
तपासादरम्यान पोलिसांनी तिच्याकडून एक सॅमसंग मोबाईल जप्त केला आहे. या मोबाईलच्या तांत्रिक विश्लेषणातून धक्कादायक पुरावे हाती आले आहेत. ही महिला IMO आणि व्हॉट्सॲपच्या माध्यमातून बांगलादेशी कंट्री कोड असलेल्या (+880) क्रमांकांवर सतत संपर्कात होती. तिच्या मोबाईलमध्ये बांगलादेशच्या जन्मदाखल्याची प्रतही आढळून आली आहे.
सर्वात गंभीर बाब म्हणजे, या महिलेने तिच्या मृत बहिणीच्या नावावरील लाईट बिल व इतर कागदपत्रांचा वापर करून स्वतःचे बनावट रेशन कार्ड, आधार कार्ड, मतदान ओळखपत्र, पॅन कार्ड आणि बँक पासबुक बनवून घेतले होते. एवढेच नव्हे तर, या बनावट कागदपत्रांच्या आधारे तिने भारतीय पासपोर्ट देखील मिळवला. याच पासपोर्टवर ती मे २०२३ मध्ये बांगलादेशात जाऊन पुन्हा भारतात परतली होती.
या प्रकरणात बनावट कागदपत्रे तयार करून देणारे एजंट आणि दलालांचा शोध पोलीस घेत आहेत. जळगाव पोलिसांनी नागरिकांना आवाहन केले आहे की, परिसरात संशयास्पद व्यक्ती किंवा बनावट कागदपत्रांवर राहणाऱ्यांची माहिती पोलिसांना तातडीने द्यावी.
