जळगाव प्रतिनिधी | जळगाव शहरातील बहुचर्चित आणि संपूर्ण जिल्ह्याला हादरवून सोडणाऱ्या एमडी ड्रग्स (MD Drugs) प्रकरणातील आरोपींवर आता प्रशासनाने अत्यंत कडक पावले उचलण्यास सुरुवात केली आहे. या गुन्ह्यातील अटकेत असलेला संशयित आरोपी रईस देशमुख याच्या सुप्रीम कॉलनीतील घरासमोरील अतिक्रमित दोन दुकानांवर आज महानगरपालिका आणि एमआयडीसी पोलिसांनी संयुक्त कारवाई करत बुलडोझर चालवला. प्रशासनाच्या या धडक कारवाईमुळे जळगाव शहरातील गुन्हेगारी जगतात आणि ड्रग्स माफियांचे धाबे दणाणले असून प्रचंड खळबळ उडाली आहे.
या बहुचर्चित एमडी ड्रग्स प्रकरणात एमआयडीसी पोलिसांनी आतापर्यंत एकूण सहा जणांविरुद्ध गुन्हा दाखल केला आहे. यापैकी रईस देशमुखसह चार मुख्य आरोपींना पोलिसांनी बेड्या ठोकल्या आहेत, तर दोन आरोपी अद्यापही फरार असून पोलीस त्यांचा कसून शोध घेत आहेत. आरोपींनी ड्रग्सच्या काळ्या पैशातून किंवा बेकायदेशीरपणे सरकारी जागेवर अतिक्रमणे केल्याचे तपासात समोर आले होते. त्यानुसार एमआयडीसी पोलिसांनी महापालिकेच्या अतिक्रमण विभागाशी रीतसर पत्रव्यवहार केला होता. पोलिसांच्या पत्राची तात्काळ दखल घेत मनपा प्रशासनाने पोलीस बंदोबस्तात ही धडक मोहीम राबवली.
महानगरपालिकेचे उपायुक्त पंकज गोसावी यांनी दिलेल्या माहितीनुसार, एमआयडीसी पोलीस ठाण्याकडून मिळालेल्या पत्रव्यवहारानंतर ही कारवाई करण्यात आली आहे. रईस देशमुख याने सुप्रीम कॉलनी भागात केलेले बेकायदेशीर बांधकाम आणि दोन दुकाने निष्कासित करण्यात आली आहेत. तसेच, या प्रकरणातील इतर आरोपींच्या घरांची आणि बांधकामांची तपासणी सुरू असून, ज्या आरोपींनी बेकायदेशीर अतिक्रमणे केली आहेत, त्यांचीही घरे आणि दुकाने येत्या काळात तोडली जाणार आहेत.
पोलिसांच्या या आक्रमक पवित्र्यामुळे अमली पदार्थांची तस्करी करणाऱ्या गुन्हेगारांमध्ये भीतीचे वातावरण पसरले आहे. पुढील तपास एमआयडीसी पोलीस करत आहेत.
