भडगाव प्रतिनिधी । निसर्गाची किमया खरोखरच न्यारी असते याचा प्रत्यय भडगाव तालुक्यातील वाडे येथे आला आहे. येथे एका केळीच्या झाडाला एक नव्हे तर तब्बल २०० हून अधिक कंबळ लागल्याचा अद्भूत चमत्कार घडला आहे. या अनोख्या निसर्गाच्या चमत्काराची सध्या सर्वत्र जोरदार चर्चा सुरू आहे.
मिळालेल्या माहितीनुसार, भडगाव तालुक्यातील वाडे येथील प्रगतीशील शेतकरी शांताराम भगवान गोठवाळ यांनी आपल्या शेतात १ एकर क्षेत्रात केळी पिकाची लागवड केली आहे. अत्यंत मेहनत आणि कष्टाने त्यांनी ही केळीची बाग फुलविली आहे. सध्या ही बाग घडांनी चांगलीच बहरली आहे. मात्र, या बागेतील एका केळीच्या झाडाला चक्क एक नव्हे तर २१४ केळीचे कंबळ लागल्याचे चित्र पाहायला मिळत आहे. सामान्यतः एका केळीच्या झाडाला एकच कंबळ येते, तर काही दुर्मिळ प्रसंगी एका झाडाला २ ते ३ कंबळ लागल्याचे आजवर ऐकण्यात किंवा पाहण्यात आले आहे. मात्र येथे एकाच झाडाला २०० पेक्षा जास्त कंबळ लागल्याने आश्चर्य व्यक्त केले जात आहे.
याशिवाय, वाडे येथील या शेतकऱ्याच्या शेतातील एका केळीच्या झाडाला तब्बल २४ केळीच्या घडासह फण्या लागलेल्या असून हे झाड सध्या चांगलेच पोसत आहे. हा निसर्गाचा एक अद्भूत आणि अवाक करणारा चमत्कार आहे. हा अनोखा आणि दुर्मिळ केळीचा कंबळ पाहण्यासाठी दररोज परिसरातील शेतकरी आणि नागरिक शेतात मोठ्या प्रमाणावर गर्दी करत आहेत, अशी माहिती शेतकरी शांताराम गोठवाळ, नाना गोठवाळ आणि हेमराज परदेशी यांनी दिली आहे.
