पाचोरा प्रतिनिधी | पाचोरा शहरातील स्वस्त धान्य दुकानाच्या कथित मनमानी कारभाराविरोधात काँग्रेसने मंगळवारी तहसील कार्यालयावर धडक मोर्चा काढून जोरदार आंदोलन केले. आगाऊ फिंगरप्रिंट घेऊनही लाभार्थ्यांना धान्य न देता त्यांचा हक्काचा साठा लाटल्याचा आरोप करत संबंधित रेशन दुकानदाराचा परवाना तातडीने रद्द करून सखोल चौकशी करण्याची मागणी करण्यात आली.
देशमुखवाडी परिसरातील स्वस्त धान्य दुकान क्रमांक ११६ येथे जून महिन्याचे धान्य एफपीएस मशीनवर उपलब्ध असल्याचे दिसत असतानाही अनेक लाभार्थ्यांना धान्य मिळाले नसल्याची तक्रार नागरिकांनी काँग्रेसचे तालुका अध्यक्ष सचिन सोमवंशी यांच्याकडे केली होती. या प्रकरणाची दखल घेत काँग्रेसने वंचित लाभार्थ्यांसह तहसील कार्यालयावर मोर्चा काढला. तहसीलदारांच्या दालनासमोर ठिय्या आंदोलन करून संबंधित दुकानदाराविरोधात कठोर कारवाईची मागणी करण्यात आली. तहसीलदार विजय बनसोडे यांनी चौकशीचे आश्वासन दिल्यानंतर आंदोलन मागे घेण्यात आले.
यावेळी तालुका अध्यक्ष सचिन सोमवंशी, ब्लॉक अध्यक्ष इरफान मणियार, एस.सी. सेलचे तालुका अध्यक्ष श्रावण गायकवाड, माजी शहराध्यक्ष शरिफ वेंडर यांच्यासह काँग्रेसचे पदाधिकारी व कार्यकर्ते मोठ्या संख्येने उपस्थित होते.
दरम्यान, निवेदनाद्वारे श्रावणबाळ योजनेच्या सुमारे ११ हजार ४०० लाभार्थ्यांना मे महिन्यापासून तसेच इंदिरा गांधी वृद्धापकाळ योजनेतील सुमारे ४ हजार ८०० लाभार्थ्यांना मार्च २०२६ पासून अनुदान मिळाले नसल्याचा मुद्दाही उपस्थित करण्यात आला. संबंधित लाभार्थ्यांच्या खात्यावर तातडीने अनुदान जमा करून त्यांना न्याय द्यावा, अशी मागणी काँग्रेसतर्फे करण्यात आली.
