जळगाव प्रतिनिधी : जळगाव ते छत्रपती संभाजीनगर महामार्गावरील रेमंड चौफुली जवळ भरधाव वेगाने येणाऱ्या ट्रकने पुढे जात असलेल्या दुचाकीला जोरदार धडक दिल्याने दोन जण गंभीर जखमी झाल्याची घटना शुक्रवारी 17 जुलै रोजी सायंकाळी 6 वाजेच्या सुमारास घडली. जखमी झालेल्या दोघांना शासकीय वैद्यकीय महाविद्यालयात दाखल करण्यात आले आहे.
सूत्रांकडून मिळालेल्या माहितीनुसार, छत्रपती संभाजीनगर कडून जळगाव शहरात येणारा ट्रक (क्रमांक टीएन 47 एक्यू 8403) याने पुढे जात असलेल्या दुचाकीवरील दोघांना मागून जोरदार धडक दिली. या धडकेत शेखर ईश्वर सपकाळे (वय 25, रा.धामणगाव तालुका जळगाव) आणि पीयुष प्रदीप बेंडाळे (वय-20, रा.अयोध्या नगर जळगाव) हे दोन जण गंभीर जखमी झाले आहेत.
एमआयडीसीतील एका कंपनीतून काम आटपून दोघे दुचाकीने घरी जात असताना हा अपघात घडला आहे. अपघात घडताच परिसरातील नागरिकांनी धाव घेतली आणि जखमी झालेल्या लोकांना खाजगी वाहनातून शासकीय वैद्यकीय महाविद्यालयात दाखल करण्यात आले आहे. दोघांवर उपचार सुरू असून यासंदर्भात पोलिसात अद्याप कुठलीही नोंद करण्यात आलेली नाही.
