भुसावळ प्रतिनिधी | आषाढी एकादशीच्या पार्श्वभूमीवर जिल्ह्यातील वारकऱ्यांसाठी भुसावळ ते पंढरपूर विशेष मोफत रेल्वे सेवा यंदाही सुरू करण्यात आली आहे. खासदार रक्षाताई खडसे यांच्या पुढाकारातून गेल्या १२ वर्षांपासून अखंडपणे सुरू असलेल्या या उपक्रमामुळे हजारो भाविकांना पंढरपूरच्या विठ्ठल-रुक्मिणीच्या दर्शनासाठी सुरक्षित, सोयीस्कर आणि मोफत प्रवासाची सुविधा उपलब्ध होत आहे.
दरवर्षी आषाढी वारीसाठी जिल्ह्यातील मोठ्या संख्येने वारकरी पंढरपूरकडे रवाना होतात. त्यांची गैरसोय टाळण्यासाठी आणि प्रवास अधिक सुलभ व्हावा या उद्देशाने ही विशेष रेल्वे सेवा सुरू करण्यात आली आहे. या सेवेमुळे आर्थिकदृष्ट्या दुर्बल भाविकांनाही कोणताही अतिरिक्त खर्च न करता पंढरपूरला जाण्याची संधी मिळत असल्याने वारकऱ्यांकडून समाधान व्यक्त करण्यात येत आहे.
यावेळी खासदार रक्षाताई खडसे म्हणाल्या की, आषाढी एकादशीला विठ्ठल-रुक्मिणीचे दर्शन घेणे हे प्रत्येक वारकऱ्याचे स्वप्न असते. त्या भाविकांच्या सेवेसाठी ही मोफत रेल्वे सुरू ठेवण्यात आली असून, हजारो वारकऱ्यांना विठ्ठल दर्शन घडवण्याचे भाग्य लाभत असल्याचे समाधान या उपक्रमातून मिळते.
या विशेष रेल्वे सेवेला जिल्ह्यातील वारकऱ्यांचा उत्स्फूर्त प्रतिसाद लाभत असून, अनेक भाविकांनी खासदार रक्षाताई खडसे यांच्या या उपक्रमाचे स्वागत केले आहे. सलग १२ वर्षांपासून सुरू असलेल्या या सेवेमुळे आषाढी वारीचा प्रवास अधिक आनंददायी, सुरक्षित आणि सुविधायुक्त झाल्याची भावना वारकरी बांधवांनी व्यक्त केली आहे.
