जळगाव प्रतिनिधी | जळगाव शहरातील आर.एल. चौफुली परिसरात अज्ञात वाहनाच्या धडकेत दुचाकीस्वाराचा जागीच मृत्यू झाल्याची दुर्दैवी घटना रविवारी दुपारी घडली. या अपघातात अयोध्या नगर येथील रहिवासी संदीप सुपडू अलकरी (वय ४८) यांचा मृत्यू झाला असून, या घटनेमुळे परिसरात हळहळ व्यक्त होत आहे.
मिळालेल्या माहितीनुसार, संदीप अलकरी हे एमआयडीसी परिसरातील एका खासगी कंपनीत कार्यरत होते. रविवारी दुपारी काम आटोपून ते नेहमीप्रमाणे दुचाकीने आपल्या घरी परतत होते. सायंकाळी चार वाजण्याच्या सुमारास आर.एल. चौफुली येथे अज्ञात भरधाव वाहनाने त्यांच्या दुचाकीला जोरदार धडक दिली. धडक इतकी भीषण होती की, संदीप अलकरी यांचा घटनास्थळीच मृत्यू झाला.
अपघाताची माहिती मिळताच परिसरातील नागरिकांनी तातडीने धाव घेत त्यांना जिल्हा शासकीय वैद्यकीय महाविद्यालय व रुग्णालयात हलविले. मात्र, तपासणीअंती वैद्यकीय अधिकाऱ्यांनी त्यांना मृत घोषित केले.
घटनेची माहिती मिळाल्यानंतर एमआयडीसी पोलिसांनी घटनास्थळी भेट देऊन पंचनामा केला.
अपघातानंतर चालक वाहनासह पसार झाला असून, संबंधित अज्ञात वाहनाचा शोध घेण्यासाठी पोलिसांनी तपास सुरू केला आहे. या प्रकरणी एमआयडीसी पोलीस ठाण्यात अकस्मात मृत्यूची नोंद करण्यात येत असून पुढील तपास सुरू आहे.
संदीप अलकरी यांच्या पश्चात पत्नी, एक मुलगा आणि एक मुलगी असा परिवार आहे. अचानक झालेल्या या अपघाती निधनामुळे कुटुंबीयांवर दुःखाचा डोंगर कोसळला असून, जिल्हा शासकीय वैद्यकीय महाविद्यालयात नातेवाईक आणि परिचितांनी मोठी गर्दी केली होती.
