यावल | प्रतिनिधी
यावल शहरासह तालुक्यात गेल्या दोन दिवसांपासून सुरू असलेल्या मुसळधार पावसामुळे जनजीवन विस्कळीत झाले असून अनेक ठिकाणी पाणी साचल्याने नागरिकांना अडचणींचा सामना करावा लागत आहे. दरम्यान, यावल शहरालगतच्या राष्ट्रीय महामार्गावरील आठवडे बाजार परिसरात शुक्रवारी सकाळी एक भलेमोठे वडाचे झाड अचानक रस्त्यावर कोसळल्याने काही काळ वाहतुकीचा खोळंबा झाला. सुदैवाने या घटनेत कोणतीही जीवितहानी किंवा गंभीर दुखापत झाली नाही.
शुक्रवार हा यावलचा आठवडे बाजाराचा दिवस असल्याने परिसरात नागरिकांची वर्दळ होती. झाड कोसळताना जवळ उभ्या असलेल्या दोन ऑटो रिक्षांचे नुकसान झाले. मात्र, चालक आणि नागरिक वेळीच बाजूला झाल्याने मोठी दुर्घटना टळली. या घटनेमुळे परिसरात काही काळ भीतीचे वातावरण निर्माण झाले होते.
घटनेची माहिती मिळताच सार्वजनिक बांधकाम विभागाचे वरिष्ठ लिपिक विकास जंजाळे यांनी तातडीने घटनास्थळी धाव घेतली. मजुरांच्या मदतीने झाडाचे तुकडे करून रस्त्यावरून हटविण्यात आले. त्यामुळे काही वेळातच वाहतूक पूर्ववत करण्यात आली.
दरम्यान, यावल ते फैजपूर या राष्ट्रीय महामार्गालगत अनेक मोठी झाडे धोकादायक स्थितीत असल्याचे नागरिकांनी सांगितले. सततच्या पावसामुळे ही झाडे कधीही कोसळण्याची शक्यता असल्याने संभाव्य अपघात टाळण्यासाठी प्रशासनाने तातडीने सर्वेक्षण करून धोकादायक झाडांवर योग्य उपाययोजना कराव्यात, अशी मागणी नागरिकांकडून करण्यात येत आहे.
