यावल प्रतिनिधी | यावल शहरासह तालुक्यातील वेगवेगळ्या घटनांमध्ये तिघांनी आत्महत्या केल्याने परिसरात खळबळ उडाली आहे. यातील दोन तरुणांनी गळफास घेतला, तर एका व्यक्तीचा मृतदेह शेतातील विहिरीत आढळून आला. या तिन्ही घटनांप्रकरणी यावल पोलीस ठाण्यात अकस्मात मृत्यूची नोंद करण्यात आली आहे.
यावल शहरातील चोपडा रस्त्यावरील इंदिरा गांधी हायस्कूलजवळील डांगपुरा भागात शेख मुजाहिद शेख मुन्शी मोमीन (३९) यांनी गळफास घेतल्याची घटना रविवारी रात्री उघडकीस आली. त्यांना तातडीने ग्रामीण रुग्णालयात दाखल करण्यात आले; मात्र डॉक्टरांनी मृत घोषित केले.
दुसऱ्या घटनेत सांगवी खुर्द येथील प्रमोद श्रावण गोसावी (४१) यांनी पायाच्या आजाराला कंटाळून गळफास घेतल्याचे सांगण्यात आले. उपचारासाठी यावल ग्रामीण रुग्णालयात नेल्यानंतर डॉक्टरांनी त्यांना मृत घोषित केले.
दरम्यान, दहिगाव येथील नरेंद्र उर्फ ज्ञानबा यादव पाटील (३६) हे घरातून बेपत्ता झाले होते. त्यांचा मृतदेह सोमवारी दुपारी शेतातील विहिरीत आढळून आला.या तिन्ही घटनांचा पुढील तपास पोलीस निरीक्षक रंगनाथ धारबळे यांच्या मार्गदर्शनाखाली सुरू आहे.
