जळगाव प्रतिनिधी | पाळधी येथे शाळा सुटल्यानंतर बस पकडण्यासाठी झालेल्या गर्दीत दहावीत शिकणाऱ्या १६ वर्षीय विद्यार्थिनीचा पाय घसरून बसखाली आल्याने चिरडून दुर्दैवी मृत्यू झाला. राजनंदिनी शिंदे असे मृत विद्यार्थिनीचे नाव असून ती पाळधी येथील झंवर विद्यालयात दहावीच्या वर्गात शिक्षण घेत होती. या घटनेने पाळधी परिसरात हळहळ व्यक्त होत आहे.
पाळधी येथील झंवर विद्यालयाची शाळा सुटल्यानंतर विद्यार्थ्यांची गावाकडे जाण्यासाठी बस पकडण्यासाठी मोठी गर्दी झाली होती. याचवेळी बसमध्ये चढण्याच्या प्रयत्नात राजनंदिनी शिंदे हिचा अचानक पाय घसरला. त्यामुळे ती बसखाली पडली आणि बसचे चाक अंगावरून गेल्याने तिचा जागीच किंवा गंभीर जखमी होऊन दुर्दैवी मृत्यू झाला.
घटनेची माहिती मिळताच परिसरातील नागरिकांनी घटनास्थळी धाव घेतली. मात्र, या दुर्घटनेमुळे विद्यार्थ्यांच्या सुरक्षिततेचा प्रश्न ऐरणीवर आला आहे. शाळा सुटल्यानंतर बसस्थानक परिसरात मोठ्या प्रमाणावर विद्यार्थ्यांची गर्दी होत असते. बसमध्ये चढण्यासाठी विद्यार्थ्यांमध्ये होणारी धावपळ आणि अपुऱ्या बससेवेमुळे अशा दुर्घटना घडण्याची शक्यता असल्याचे ग्रामस्थांचे म्हणणे आहे.
राजनंदिनीच्या अपघाती मृत्यूने तिच्या कुटुंबीयांवर दुःखाचा डोंगर कोसळला असून सहकारी विद्यार्थी आणि शिक्षकांमध्येही शोककळा पसरली आहे.
दरम्यान, या घटनेनंतर ग्रामस्थांनी संताप व्यक्त केला असून विद्यार्थ्यांसाठी स्वतंत्र बसफेऱ्या सुरू कराव्यात, अशी जोरदार मागणी केली आहे. शाळा सुटण्याच्या वेळेत विद्यार्थ्यांची संख्या लक्षात घेऊन अतिरिक्त बससेवा उपलब्ध करून देण्याची मागणीही करण्यात आली आहे. यावेळी जिल्हा शासकीय वैद्यकीय महाविद्यालयात नातेवाईकांनी एकच आक्रोश केल्याचे दिसून आले. या संदर्भात संबंधित पोलीस ठाण्यामध्ये गुन्हा दाखल करण्याचे काम सुरू आहे.
