जळगाव (प्रतिनिधी) : जळगाव शहरातील संवेदनशील पोलीस ठाण्यांपैकी एक असलेल्या शनिपेठ पोलीस ठाण्याचे प्रभारी पोलीस निरीक्षक डॉ. विशाल जयस्वाल यांची पोलीस मुख्यालयातील नियंत्रण कक्षात बदली करण्यात आली आहे. गुरुवार, २२ ऑक्टोबर रोजी सायंकाळच्या सुमारास बदलीचे आदेश जारी झाल्याची माहिती समोर आली आहे. अचानक झालेल्या या प्रशासकीय निर्णयामुळे जळगाव पोलीस दलात चर्चांना उधाण आले आहे.
डॉ. विशाल जयस्वाल हे सुमारे सहा महिन्यांपूर्वी रावेर येथून बदली होऊन जळगावमध्ये रुजू झाले होते. त्यांच्याकडे शहरातील शनिपेठ पोलीस ठाण्याच्या प्रभारी पदाची जबाबदारी सोपविण्यात आली होती. शनिपेठ पोलीस ठाण्याच्या हद्दीत कायदा व सुव्यवस्था राखण्याच्या दृष्टीने पोलिसांसमोर अनेक आव्हाने असतात. त्यामुळे या ठाण्याच्या प्रभारी अधिकाऱ्याच्या बदल्येकडे विशेष लक्ष दिले जात आहे.
दरम्यान, शनिपेठ पोलीस ठाण्याच्या हद्दीतील कथित अवैध धंद्यांबाबत वरिष्ठ पोलीस अधिकाऱ्यांकडे वारंवार तक्रारी होत असल्याची चर्चा होती. याच पार्श्वभूमीवर डॉ. जयस्वाल यांची नियंत्रण कक्षात बदली झाल्याचे बोलले जात आहे. मात्र, या बदलीचा कथित तक्रारींशी थेट संबंध असल्याची अधिकृत पुष्टी झालेली नाही. त्यामुळे बदलीमागील नेमके कारण अद्याप स्पष्ट झालेले नाही.
गुरुवारी सायंकाळी अचानक बदलीचे आदेश जारी झाल्याने पोलीस विभागातील अधिकारी आणि कर्मचाऱ्यांमध्ये या निर्णयाबाबत चर्चा सुरू झाली आहे. प्रशासकीय स्तरावर झालेल्या या बदलामुळे शनिपेठ पोलीस ठाण्याच्या कामकाजाची जबाबदारी आता कोणाकडे सोपवली जाणार, हा महत्त्वाचा प्रश्न उपस्थित झाला आहे.
नवीन प्रभारी अधिकाऱ्याची नियुक्ती झाल्यानंतर शनिपेठ पोलीस ठाण्याच्या हद्दीतील कायदा व सुव्यवस्था, तसेच अवैध धंद्यांविरोधातील कारवाईबाबत पोलीस प्रशासन कोणती भूमिका घेते, याकडे नागरिकांचे लक्ष लागले आहे. वरिष्ठ पोलीस प्रशासनाकडून पुढील निर्णय काय घेतला जातो, हे पाहणे महत्त्वाचे ठरणार आहे.
