जळगाव (प्रतिनिधी) | जळगाव बायपासवरील रेल्वे पुलाच्या कामादरम्यान क्रेनसह खाली कोसळून चालकाचा मृत्यू झाल्याप्रकरणी ठेकेदार हरिओम लक्ष्मीनारायण ओझा (रा. इंदूर, मध्यप्रदेश) आणि दुसरा क्रेन ऑपरेटर बन्समनी जानकीप्रसाद प्रजापती यांच्याविरुद्ध गुन्हा दाखल करण्यात आला आहे.
मधुकर धनराज पाटील (४३, रा. खपाट, ता. धरणगाव) असे मृत चालकाचे नाव आहे. २३ ऑक्टोबर रोजी रेल्वे पुलाच्या सिमेंट काँक्रीटचे जॉइंट स्लॅब काढण्याचे काम सुरू होते. यावेळी मधुकर पाटील हे क्रेनच्या साहाय्याने स्लॅब वर उचलून धरत होते. पुलाच्या दुसऱ्या बाजूला बन्समनी प्रजापती हा दुसऱ्या क्रेनच्या मदतीने स्लॅबला खालून आधार देत होता.
मात्र, प्रजापती याने खालचा आधार काढून घेतल्याने मधुकर पाटील यांच्या क्रेनची रोप वायर तुटली. त्यामुळे क्रेनसह पाटील पुलावरून खाली कोसळले. या दुर्घटनेत त्यांचा मृत्यू झाला.
या कामादरम्यान ठेकेदाराने मधुकर पाटील यांना सुरक्षेची आवश्यक साधने दिली नव्हती. तसेच पुलाखाली सुरक्षा जाळी न लावताच काम सुरू असल्याचे फिर्यादीत नमूद करण्यात आले आहे.
या प्रकरणी मृताचे चुलत भाऊ दीपक वामन पाटील (५०, रा. खपाट, ता. धरणगाव) यांनी पाळधी पोलीस औट पोस्ट येथे फिर्याद दिली. त्यानुसार ठेकेदार हरिओम ओझा आणि क्रेन ऑपरेटर बन्समनी जानकीप्रसाद प्रजापती या दोघांविरुद्ध गुन्हा दाखल करण्यात आला असून, पुढील तपास सुरू आहे.
