जळगाव प्रतिनिधी |जळगाव जिल्हा मध्यवर्ती सहकारी बँकेच्या निवडणुकीत महायुतीमधील जागावाटपाचा तिढा अद्याप कायम आहे. हा तिढा सोडवण्यासाठी महायुतीच्या प्रमुख नेत्यांची महत्त्वपूर्ण बंदद्वार बैठक जळगाव येथील अजिंठा विश्रामगृहात सुरू झाली आहे. मंत्री गुलाबराव पाटील आणि मंत्री गिरीश महाजन यांच्या प्रमुख उपस्थितीत ही बैठक होत आहे.
जिल्हा बँकेच्या निवडणुकीसाठी उद्या, १७ नोव्हेंबर रोजी उमेदवारी अर्ज मागे घेण्याची अंतिम मुदत आहे. मात्र, महायुतीमधील जागावाटपाचा प्रश्न अद्याप मार्गी लागलेला नाही. त्यामुळे उमेदवारी अर्ज माघारी घेण्यापूर्वी एकमत घडवून आणण्यासाठी महायुतीच्या नेत्यांनी जोरदार हालचाली सुरू केल्या आहेत.
या बैठकीला मंत्री गिरीश महाजन, मंत्री गुलाबराव पाटील, आमदार अनिल पाटील यांच्यासह महायुतीतील प्रमुख नेते उपस्थित आहेत. प्रामुख्याने मुक्ताईनगर, चोपडा, पाचोरा आणि भडगाव या जागांवरून महायुतीमध्ये मतभेद निर्माण झाल्याचे समजते. या जागांवर कोणत्या पक्षाचा उमेदवार राहणार, यावरून पेच निर्माण झाला आहे.
जिल्हा बँकेच्या निवडणुकीत महायुतीतील घटक पक्षांमध्ये समन्वय साधणे नेत्यांसाठी मोठे आव्हान ठरत आहे. उद्या अर्ज माघारीची अंतिम मुदत असल्याने वेळ कमी आहे. त्यामुळे अजिंठा विश्रामगृहातील या बैठकीत नेते कोणता तोडगा काढतात, जागावाटपाचा फॉर्म्युला निश्चित होतो का आणि महायुती एकत्रितपणे निवडणुकीला सामोरे जाते का, याकडे संपूर्ण जिल्ह्याचे लक्ष लागले आहे.



