जळगाव प्रतिनिधी | विधानपरिषद निवडणुकीच्या पार्श्वभूमीवर जळगाव जिल्ह्यातील राजकीय घडामोडींना वेग आला आहे. महाविकास आघाडीचे ज्येष्ठ नेते आणि राष्ट्रवादी काँग्रेस (शरदचंद्र पवार) पक्षाचे प्रदेशाध्यक्ष आमदार जयंत पाटील ६ जून रोजी जळगाव जिल्हा दौऱ्यावर आले होते.
या दौऱ्यादरम्यान महाविकास आघाडीचे विधानपरिषदेचे अधिकृत उमेदवार शरद तायडे यांनी जयंत पाटील यांची भेट घेतली. या भेटीत आगामी विधानपरिषद निवडणुकीच्या रणनीती संदर्भात दोन्ही नेत्यांमध्ये सविस्तर आणि सकारात्मक चर्चा झाली.
यावेळी उमेदवाराला आश्वस्त करताना जयंत पाटील म्हणाले की, “राष्ट्रवादी काँग्रेस (शरदचंद्र पवार) पक्ष हा महाविकास आघाडीचा एक प्रमुख आणि महत्त्वाचा घटक पक्ष आहे. आघाडीचा धर्म पाळत पक्ष पूर्ण ताकदीने विधान परिषदेचे उमेदवार शरद तायडे यांच्या पाठीशी खंबीरपणे उभा राहील.” तसेच शरद तायडे यांच्या विजयासाठी जळगाव जिल्ह्यातील पक्षाचे सर्व पदाधिकारी आणि कार्यकर्ते पूर्ण क्षमतेने काम करतील, असा विश्वासही त्यांनी यावेळी व्यक्त केला.
या महत्त्वपूर्ण बैठकीला महाविकास आघाडीतील तिन्ही पक्षांचे प्रमुख नेते आणि पदाधिकारी मोठ्या संख्येने उपस्थित होते. यामध्ये राष्ट्रवादी युवक काँग्रेसचे प्रदेशाध्यक्ष महेबूब शेख, माजी आमदार शिरीष चौधरी, राष्ट्रवादी काँग्रेसचे जिल्हाध्यक्ष प्रमोद बापू पाटील, पक्षाचे निरीक्षक भास्करराव काळे, शिवसेना (उद्धव बाळासाहेब ठाकरे) पक्षाचे जिल्हाप्रमुख भूषण पाटील, काँग्रेसचे जिल्हाध्यक्ष धनंजय चौधरी, दिलीप खोडपे सर, राष्ट्रवादी काँग्रेसचे माजी महानगर प्रमुख अशोक लाडवंजारी आणि प्रसिद्ध उद्योजक श्रीराम पाटील आदी मान्यवरांचा समावेश होता. या बैठकीमुळे महाविकास आघाडीच्या कार्यकर्त्यांमध्ये प्रचंड उत्साह दिसून येत असून, निवडणुकीतील विजयासाठी आघाडीने जळगावात जोरदार मोर्चेबांधणी सुरू केल्याचे स्पष्ट होत आहे.
