चोपडा विलास पाटील| चोपडा तालुक्यातील वड्या गाव परिसरात नोंदणी नसतानाही वैद्यकीय व्यवसाय करून नागरिकांच्या आरोग्याशी खेळ सुरू असल्याचा धक्कादायक प्रकार समोर आला आहे. या प्रकरणी अडावद पोलिस ठाण्यात संबंधित व्यक्तीविरुद्ध गुन्हा दाखल करण्यात आला आहे.
पोलिसांच्या नोंदीनुसार, अरुणकुमार अजयकुमार आढळ (वय ४१, रा. बल्लाळपूर, पोस्ट अंबिकापूर, ता. जि. नांदेड) याच्यावर कोणतीही वैध वैद्यकीय नोंदणी अथवा पात्रता नसताना रुग्णांवर उपचार केल्याचा आरोप आहे. या प्रकरणी प्राथमिक आरोग्य केंद्र अडावद येथील डॉक्टर शुभम शेखराव पाटील (वय ३२) यांनी पोलिसांत तक्रार दाखल केली.
तपासादरम्यान संबंधित ठिकाणी विविध प्रकारचे इंजेक्शन, औषधांच्या गोळ्या, सलाईन तसेच उपचारासाठी वापरले जाणारे वैद्यकीय साहित्य आढळून आल्याची नोंद आहे. यामध्ये विविध इंजेक्शनसह मोठ्या प्रमाणात औषधसाठा आणि इतर वैद्यकीय साहित्याचा समावेश आहे.
या प्रकरणी अडावद पोलिसांनी गुन्हा दाखल करण्यात आला असून संशयित आरोपीला अटक करण्यात आली आहे.
