जळगाव प्रतिनिधी | फैजपूर पोलीस ठाण्याच्या हद्दीतील अकलूद गावाच्या शिवारात तापी नदीच्या काठावर सुरू असलेल्या कथित कुंटणखान्यावर पोलिसांनी धडक कारवाई केली. पोलिसांच्या नियोजनबद्ध कारवाईत वेश्याव्यवसायासाठी आणलेल्या चार महिलांची सुटका करण्यात आली असून, कुंटणखाना चालवणाऱ्या मनीषा प्रकाश झोपे (वय ४५, रा. अकलूद, ता. यावल) हिच्यावर कारवाई करण्यात आली आहे.
मिळालेल्या माहितीनुसार, एका दुमजली घरात वेश्याव्यवसाय सुरू असल्याची गोपनीय माहिती पोलिसांना मिळाली होती. त्यानंतर पोलिसांनी घाई न करता संपूर्ण प्रकरणाची माहिती घेण्यासाठी पंटर पाठवला. माहितीची खातरजमा झाल्यानंतर उपविभागीय पोलीस कार्यालय फैजपूर, यावल पोलीस ठाणे आणि निंभोरा पोलीस ठाण्याच्या अधिकारी-अंमलदारांच्या संयुक्त पथकाने रात्री सुमारे आठ वाजता छापा टाकला.
कारवाईदरम्यान घरामध्ये अनेक खोल्या तयार करण्यात आल्याचे समोर आले. वेश्याव्यवसाय करणाऱ्या चार महिलांची पोलिसांनी सुटका केली. यातील तीन महिला मूळच्या कलकत्ता, पश्चिम बंगाल येथील असून भुसावळ येथे स्थायिक आहेत, तर एक महिला भुसावळ येथील असल्याची माहिती पोलिसांनी दिली.
या कारवाईमुळे परिसरात खळबळ उडाली असून, पुढील तपास पोलिसांकडून सुरू आहे.
