जळगाव प्रतिनिधी | जळगाव शहरासह जिल्ह्यातील काही तालुक्यांमध्ये आज सकाळी सुमारे ९ वाजेच्या सुमारास भूकंपाचे सौम्य धक्के जाणवल्याची घटना समोर आली आहे. जळगाव शहरासह भुसावळ, वरणगाव, सावदा, मुक्ताईनगर, रावेर आणि परिसरातील इतर भागांमध्ये हे धक्के जाणवल्याचे सांगण्यात येत आहे. अचानक जाणवलेल्या या धक्क्यांमुळे नागरिकांमध्ये काही काळ भीतीचे वातावरण निर्माण झाले होते.
सकाळच्या वेळी अचानक जमीन हादरल्याची जाणीव झाल्याने नागरिकांमध्ये एकच चर्चा सुरू झाली. काही नागरिकांनी घराबाहेर धाव घेतली, तर अनेकांनी एकमेकांना फोन करून भूकंपाच्या धक्क्यांबाबत माहिती घेतली. या घटनेमुळे जिल्ह्यातील विविध भागांमध्ये काही काळ संभ्रमाचे वातावरण होते.
दरम्यान, या घटनेला जिल्हाधिकारी रोहन घुगे यांनी दुजोरा दिला आहे. भूकंपाचे सौम्य धक्के जाणवल्याची माहिती समोर आली असली, तरी सुदैवाने या घटनेत कोणतीही जीवितहानी झालेली नाही. तसेच मालमत्तेचे किंवा इतर कोणत्याही प्रकारचे नुकसान झाल्याचे वृत्त नाही.
भूकंपाच्या धक्क्यांमुळे नागरिकांमध्ये निर्माण झालेल्या भीतीच्या पार्श्वभूमीवर प्रशासनाकडून परिस्थितीवर लक्ष ठेवले जात आहे. भूकंपाची तीव्रता, केंद्रबिंदू आणि इतर तांत्रिक तपशीलांबाबत अधिकृत माहिती मिळाल्यानंतरच नेमके चित्र स्पष्ट होणार आहे.
