जळगाव प्रतिनिधी | जळगाव तालुक्यातील आसोदा ते भोलाणे रस्त्यावर शेताकडे जाणाऱ्या मार्गावरील खड्ड्यात ३८ वर्षीय तरुणाचा मृतदेह दुचाकीसह आढळून आल्याने परिसरात मोठी खळबळ उडाली आहे. गलू देवीदास कोळी (रा. भोलाणे, ता. जळगाव) असे मृत तरुणाचे नाव आहे. या घटनेप्रकरणी जळगाव तालुका पोलीस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, गलू कोळी हे १० नोव्हेंबर रोजी घरातून बाहेर पडले होते. मात्र, बराच वेळ होऊनही ते घरी परतले नाहीत. त्यामुळे नातेवाईकांनी रात्री १० वाजेपर्यंत त्यांचा सर्वत्र शोध घेतला. मात्र, त्यांचा कुठेही शोध लागला नव्हता.
दरम्यान, शुक्रवारी १३ नोव्हेंबर रोजी सकाळी आसोदा-भोलाणे रस्त्यावरील शेताकडे जाणाऱ्या मार्गावरील खड्ड्यात दुचाकीसह गलू कोळी यांचा मृतदेह आढळून आला. घटनेची माहिती मिळताच जळगाव तालुका पोलिसांनी घटनास्थळी धाव घेतली. त्यानंतर मृतदेह जळगाव येथील शासकीय वैद्यकीय महाविद्यालय व रुग्णालयात दाखल करण्यात आला. तेथे वैद्यकीय अधिकाऱ्यांनी तपासणी करून त्यांना मृत घोषित केले.
दरम्यान, गलू कोळी यांच्या मृत्यूबाबत त्यांच्या नातेवाईकांनी घातपाताचा संशय व्यक्त केला आहे. तीन ते चार जणांनी मिळून भावाचा घात केला असावा, असा गंभीर आरोप त्यांचे भाऊ मनोज कोळी यांनी केला आहे. त्यामुळे या मृत्यूमागील नेमके कारण काय, याबाबत परिसरात चर्चेला उधाण आले आहे. पोलिसांनी अकस्मात मृत्यूची नोंद केली असून, पुढील तपासातून मृत्यूचे कारण स्पष्ट होणार आहे.
