जळगाव प्रतिनिधी | जळगाव जिल्ह्यातील चाळीसगाव तालुक्यातील भोरटेक शेतशिवारात भक्ष्याच्या शोधात असलेला बिबट्या विहिरीत पडल्याची घटना समोर आली आहे. या घटनेमुळे परिसरातील शेतकऱ्यांमध्ये काही काळ भीतीचे वातावरण निर्माण झाले होते.
घटनेची माहिती मिळताच वन विभागाच्या अधिकाऱ्यांनी तातडीने घटनास्थळी धाव घेतली. वन विभाग आणि पोलिसांनी संयुक्तपणे बचाव मोहीम हाती घेतली. विहिरीत पडलेल्या बिबट्याला कोणतीही इजा होऊ नये, याची विशेष काळजी घेत बचावकार्य करण्यात आले.
अखेर अथक प्रयत्नांनंतर बिबट्याला सुरक्षितपणे विहिरीबाहेर काढण्यात वन विभागाच्या पथकाला यश आले. त्यामुळे बिबट्याला जीवदान मिळाले आहे. या यशस्वी बचाव मोहिमेमुळे वन विभाग आणि पोलिसांच्या तत्परतेचे कौतुक होत आहे.
भोरटेक परिसरात घडलेल्या या घटनेमुळे वन्यप्राण्यांच्या अधिवासाचा आणि त्यांच्या संरक्षणाचा प्रश्न पुन्हा एकदा चर्चेत आला आहे.
